اسلام آباد(روزنامہ استحکام) سول ایوی ایشن اتھارٹی پاکستان ( سی اے اے) نے کابل سے آنے والی تمام پروازوں کی فضائی رہنمائی کے لیے اقدامات مکمل کرتے ہوئےخصوصی نوٹس جاری کردیا۔
افغانستان کے دارالحکومت کابل میں ائیر ٹریفک کنٹرولر کی عدم دستیابی پر سی اے اے نے کابل سے آنے والی تمام پروازوں کی فضائی رہنمائی کے لیے اقدامات کرلیے ہیں اور اس ضمن میں پاکستان سول ایوی ایشن اتھارٹی نے ائیرلائنز کو نیا ہدایت نامہ جاری کردیا ہے۔
ہدایت نامے میں کہا گیا ہےکہ کابل سے پاکستان کی حدود میں داخل ہونے سے 15 منٹ قبل تمام ائیرلائنز کے کپتان ائیرٹریفک کنٹرول سینٹر سے رابطہ کریں۔
جاری ہدایات میں مزید کہا گیا ہے کہ فریکوئنسی کے ذریعے طیاروں کے کپتانوں کو پاکستانی فضائی حدود میں رہنمائی فراہم کی جائے گی۔مزید برآں سی اے اے نےاسلام آباد، لاہور اور کراچی ائیر ٹریفک کنٹرول سے رابطے کے لیے فریکوئنسی بھی جاری کردی ہے۔
